http://next.atnext.com/template/next/ar ... 9&pageno=2
http://next.atnext.com/template/next/ar ... 9&pageno=3
玩物壯志
十秒開合 摺疊單車隨身遊
短途駁腳
「公司離地鐵站都幾遠，轉車好快到，行又嘥時間，成日諗如果可以踩單車駁腳就好，不過一般摺車摺完都唔方便攜帶，未必上到巴士。」家住屯門的Amuro，區內極多人踩單車，單車需求極大，失竊亦特別嚴重。「泊低一陣，轉頭返來會唔見seat位或其他配件，而且鎖街日灑雨淋，好快殘。」
直至網上發現A-bike，一見鍾情，輾轉得知香港有得買，即時撲去入貨。「雖然個轆細，不過由灣仔地鐵站踩去愛群道的公司，條路都算平，應該都用得着。」Amuro說現時踩車返工大約十分鐘，可以順便做埋運動。
不過，買車時都有難度，因為A-bike的官方負重量為187磅，比起Amuro的體重低60磅，職員以安全為由，起初不肯賣給他。「死纏爛打，又說只會間中踩兩轉，先買得走。」因為體重超標，所以他踩得特別小心，打足胎氣，又不會「扽壆」，「踩了兩個月，好彩都未有事，好實淨。」
巨人配細車，Amuro起初都有擔心超重，不過狂睇外國單車討論區，即時放心。「仲有好多更重的外國人都有踩，唔覺有損壞報告。」
街頭示範開合動作，引來幾位識踩單車的阿叔七嘴八舌討論：「咁細個轆真係踩得？」
摺完架車，可以放入原廠背囊，揹起就行得。
收視爆燈
「A-bike可以摺到好細，真係可以揹住行，其他摺車根本冇得比。」阿奇家住馬鞍山，有十幾年踩單車經驗，亦曾於單車鋪工作，閱車無數，都大讚開合設計有睇頭。「本身有兩架摺車，但開合速度都唔及A-bike。A-bike唔重，而家去同區親戚屋企食飯，都會踩去，貪可以拎埋上樓，又唔阻地方。」
此外，阿奇說踩其他摺車，都不夠A-bike惹人注目。「尤其是落巴士打開架車，十秒開完，其他人都會覺得好神奇，收視率都幾高。」記者亦曾於將軍澳的單車徑試踩，幾乎每次停車，都有路人八卦「問價」，不過聽完都「嘩」一聲嫌貴。
「睇設計及用料，其實唔算貴，特別是架車開合方法精密。如果用料稍差，開多幾次都好易爛。」阿奇說現時內地及香港都有「老翻貨」，外形九成似，售價更低至四五百元，記者曾在羅湖商業城「試貨」，發現手工奇差。「朋友買了一架，踩了幾日車轆已出現問題，開合時更扯爛支架的膠位，坐墊又甩皮，幾平都冇用。」
冒牌A貨抄款抄到十足，要分真假，幾乎同分假金牛一樣困難。不過，相中假貨用料差，踩兩星期，膠位即爆裂（下圖）。
單車迷阿奇，本身已有兩部摺車。「A-bike的確唔多好踩，不過實在太方便，注目度又高，經常都會拎落街踩。」
終極摺王
A-bike規格表
品牌/產地：英國/中國
摺疊尺寸：67/30/16cm
展開尺寸：100/70/43cm
重量：5.6kg
輪胎：15cm
最高載重量：187磅
售價：HK$2,630
網址：http://www.a-bike.co.uk
查詢：LOG-ON 2265 5333
技術要求：★★★★★
試車後話：車輕，摺起後方便攜帶，設計抵讚。不過，開合過程稍繁複，上手需時；車轆太細，踩長途或小斜路超吃力，路面反應亦激烈，駛過稍爛地面，都會扽到屁股痛；而且重心高，車速稍慢已會向左右傾側，較難操控。
開合速試
1先將軚桿180度轉出，然後拉起坐墊，與車架保持水平。
2拉起車架頂桿，直至頭尾支柱上的安全鎖（藍圈）彈出，再扳下兩旁的保險鎖。
3將頭尾支柱前後拉開，直至底柱上的安全鎖鎖上。調整好手柄及腳踏，完成開合。
1
2
3
考起專家
邀請中文大學體育系教授兼中國香港體適能總會主席王香生試踩，起步都幾「牙煙」。「踩了好多年單車，自問都有一定技術，不過都覺得幾難上手。Strida軚桿太輕，好飄，轉彎時要好小心；A-bike重心高，keep住速度先可以保持平衡，技術要求高。」
對踩法評價差，不過王香生睇完開合過程，大讚設計概念好，更即場改名「聰明單車」。「開合速度快，摺起後易收藏，最適合居住環境狹窄的香港人。而且設計新穎，玩樂性高，更易鼓勵都市人做運動，抵讚。」
不過，由於要有一定技術先踩得掂，王香生建議最好只踩單車徑。「馬路窄，的士、貨車司機又唔會讓人，加上架車好難保持直線，好危險。」另外，他亦提醒不應貪平買翻版。「愈多摺位，等於愈多機會壞，翻版用料唔實淨，品質檢定又差，買中架劣車，踩車時突然斷開，就會失平衡發生意外。要平，不如唔好玩。」
試騎兩部摺車，因為軚桿輕如無物，令王香生都揸到「手震震」。「好難固定方向，成日左搖右擺，難踩。」
王香生先彈後讚：「摺得好細，真係好易拎，我都想買番架去單車徑踩。」
醒你
英國電視台潮物介紹節目TheGadgetShow曾比併兩部單車，短片可於網上睇。網址：
www.youtube.com/watch?v=kVVgsQt1DK4
以10km/h速度踩單車計算，一個體重60公斤人士每小時可消耗約180kcal。
算式如下：體重（公斤）×3=消耗kcal量
撰文：周群雄
攝影：吳卓凡、方保山
nextb@nextmedia.com
